Қазақстан Республикасы Мәдениет және ақпарат министрлігінің «Есік» мемлекеттік тарихи-мәдени музей-қорығы еліміздің ең ірі Апорт Молл сауда ойын-сауық орталығында 2021-2024 жылдар аралығында «Ұлы Жібек жолы: Шелектен Талғарға дейін», «Жетісу сақтарының мұрасы», «Жетісудағы қалалық мәдениет. VIII-XIV ғғ.», «Жетісудағы қалалық мәдениет» тақырыбында арнайы көшпелі көрмелерін ұйымдастырды.

Көшпелі көрме ұйымдастырудағы басты мақсат — ерте көшпелілер өркениеті мен Ұлы Жібек жолы бойында орналасқан қалалық мәдениеттің зерттелу барысы, қазіргі уақытқа жеткен нақты деректері мен тарихы жайлы таныстыру, ежелгі жауһарларымызды көрсету арқылы ауқымды мәліметтер беру.

Адамдар көп шоғырланатын орталықтағы мұндай көшпелі көрмелер көне бұйымдарды көзбен көруге және төл тарихымызмен жақын танысуға үлкен мүмкіндік береді.