2025 жылдың 14 тамызында «Есік» мемлекеттік тарихи-мәдени музей-қорығында IV Халықаралық Жазғы мекптепің үшінші жұмыс күні өтті. Аталмыш іс-шара «Оқу мәдениетін жаңғыртуға біріктіретін беттер» тақырыбында болды.
Іс-шара ЮНЕСКО-ға қарасты Халықаралық Мәдениеттерді жақындастыру Орталығы мен «Есік» мемлекеттік тарихи-мәдени музей-қорығының бірлесіп ұйымдастыруымен Абай Құнанбаевтың 180 жылдығы мен Олжас Сүлейменовтің «Аз и Я» кітабының шыққанына 50 жыл толуына орай «Білім сапасы және мәдениеттерді жақындастыру» тақырыбындағы Еуразия елдерінің педагогтарына арналған IV Халықаралық жазғы мектеп аясында өткізілді.
Семинардың басты мақсаты – білім беру сапасын арттыру, мәдениеттерді жақындастыру арқылы ғалымдар мен педагогтар арасында тәжірибе алмасу мен диалог алаңын құру, сондай-ақ мерейлі күндер мен айтулы даталарды атап өту болды.
IV Халықаралық жазғы мектеп семинарына Қазақстан, Қырғызстан, Тәжікстан, Өзбекстан және Түркия елдерінің мамандары қатысты. Олардың ішінде «Есік» мемлекеттік тарихи-мәдени музей-қорығының директоры Гүлмира Мұхтарова, Е.Бөкетов атындағы Қарағанды университеті жанындағы Сарыарқа археологиялық институтының археология және этнография музейінің меңгерушісі Марина Беделбаева, Қарағанды университетінің аға оқытушысы Анна Қалижанова, ЮНЕСКО жанындағы Халықаралық Мәдениеттерді Жақындастыру Орталығының жетекші ғылыми қызметкерлері Нұржауар Исаева мен Виктор Новоженов, «Qazaq Oner» халықаралық қауымдастығының мүшесі Гүлзира Сарсенбаева, Қолөнершілер одағының мүшесі Ұлбосын Дауленова, Республикалық Оқушылар сарайының оқытушысы Несібелі Жұмалиева сияқты ғалымдар мен педагогтар болды. Олар аймақтағы білім саласын дамыту мәселелері бойынша дәрістер оқып, өз тәжірибелерімен бөлісті.
Семинар барысында спикерлер қатысушыларға интерактивті оқыту технологияларын қолдана отырып, оқу үдерісін қызықты әрі тиімді ұйымдастыруға бағытталған әдістемелік тренингтер жүргізді.
Сонымен қатар, семинар қонақтарына «Есік» музей-қорығының экспозициялық залдары мен қазба нысандары таныстырылды. Іс-шара соңында IV Халықаралық жазғы мектептің қорытындысы шығарылып, баяндамашылар мен қатысушыларға арнайы сертификаттар мен алғыс хаттар табыс етілді.
