АНЫҚТАМА

«Есік» мемлекеттік тарихи-мәдени қорық-музейі РМҚК туралы қысқаша анықтама

«Есік» мемлекеттік тарихи-мәдени қорық-музейі РМҚК туралы қысқаша

 

АНЫҚТАМА

 

РМҚК «Есік» Мемлекеттік тарихи-мәдени қорық-музейі 1970 жылы сақ ханзадасы жерленген қорған табылған аумақта, Қазақстан Республикасы Үкіметінің 2010 жылдың 30 қаңтарындағы №43 Қаулысына сәйкес, ел президенті Н.Ә. Назарбаевтың бастамасымен іске асқан «Мәдени мұра» Стратегиялық ұлттық жобасы аясында құрылды.

Ұлы Жібек жолы бойында орналасқан «Есік» мемлекеттік тарихи-мәдени қорық-музейі — еліміздің мәдени туризмін дамытуда стратегиялық маңызды обьектілердің бірі. 2013 жылдың 09 тамызында Алматы облыстық мәслихатының №21-133 шешімі бойынша «Есік» мемлекеттік тарихи-мәдени қорық-музейінің 422,7 га қорғау аймағы белгіленді. Бүгінгі таңда аталмыш қорғау аймағына «Есік І»  қорымдарына жататын 80-н астам қорғандар, «Рахат» және «Өрікті»   сынды ежелгі сақ қала-жұрттары кіреді. Сонымен қатар, Алматы облысы Талғар ауданы әкімінің 2018 жылдың 26 маусымындағы №06-330 Қаулысы бойынша «Ортағасырлық Талғар қалашығының жер телімі «Республикалық «Есік» мемлекеттік тарихи-мәдени қорық-музейіне тұрақты пайдалануға» берілді.

Музейдің негізгі қызметі – тарихи-мәдени мұра нысандарын қорғау және сақтау мақсатында ғылыми-зерттеу, мәдени-біліми және туристік қызметтерді ұйымдастыру, Қазақстанның тарихи және рухани ескерткіштерін зерттеп, сақтау, оны жалпы халыққа насихаттау.

Қазіргі уақытта  қорық-музейдің қорғау аумағын қоршау, музей жанында орналасқан бірнеше обаларды музейлендіру, кезінде сақтардың резиденциясы болған Рахат және Өрікті қала жұрттарында қазба жұмыстарын жүргізу, оны консервациялау мен музейлендіру арқылы жаңа туристік жолдар салу, «сақ ауылы» жобасын жүзеге асыру мүмкіндіктері қарастырылуда.

2011 жылдан бастап қорық-музей  «Жетісу сақтарының мәдениеті және Есік обасы», «Жетісу сақтарының мифологиясы мен идеологиясы» тақырыбында ғылыми-қолданбалы зерттеу жұмыстарын, «Музей «ЕСІКті» ашады»,  «Алтын адамның» ашылу және зерттелу тарихы (аңызы мен ақиқаты)», «Өткенге салауат, жастарға – аманат» әлеуметтік-мәдени жобаларын да іске асырып келеді. Сонымен қатар жыл сайын тақырыптық дәрістер, семинарлар, экспедициялар мен басқа да музейлік шараларды тұрақты түрде өткізіп келеді.

«Есік» Мемлекеттік тарихи-мәдени қорық-музейінде «Сақтардың тарихы мен мәдениеті», «Алтын адам», «Қазақстан археологиясы» және «Уақытша көрмелер залы» атты 4 экспозициялық зал мен «Алтын адамды» алғаш ашушылардың бірі — археолог Бекмұханбет Нұрмұханбетовтың мемориалдық бөлмесі бар. Сонымен қатар ашық аспан астындағы жәдігерлер болып табылатын 80-н астам сақ қорғандары мен «Рахат» және «Өрікті» ежелгі сақ қала-жұрттарына да экскурсия жүргізіледі.

«Есік» қорық-музейі 2018 жылы екінші рет ғылыми субъекті ретінде аккредиттеліп, 2011 жылдан бастап лицензия археологиялық қазба жұмыстарын жүргізіп келеді. Қорық-музей  отандық және шетелдік көптеген ғылыми-мәдени ұйымдармен байланыс орнатқан.

Қорық-музейде түрлі мамандықтағы 32 адам қызмет атқарады. «Есік» мемлекеттік тарихи-мәдени қорық-музейінің директоры – тарих ғылымдарының кандидаты Мұхтарова Гүлмира Райылқызы.

Мекен-жайы: Алматы облысы, Еңбекшіқазақ ауданы, Алматы-Көктал-Көктал тасжолы, Есік кіре берісі-6,6 км.

Телефон:+7(727) 306-91-30, Телефакс:+7(72759) 2-07-50,

E-mail issyk@inbox.ru

Веб-сайт: www.issykrm.kz

https://www.facebook.com/issykzapovednikmuzey/

© 2018. «Есік» мемлекеттік тарихи-мәдени қорық-мұражайы
www.issykrm.kz